БНХАУ 2017 онд 69.35 сая тонн коксжих нүүрс импортолжээ


БНХАУ 2017 оны 12 дугаар сард 6.12 сая тонн коксжих нүүрс импортолсон нь өмнөх сараас 16 хувиар, 2016 оны мөн үеэс 4.4 хувиар өссөн талаар БНХАУ-ын Гаалийн ерөнхий газар мэдээллээ. Харин БНАСАУ-аас авдаг антрацит нүүрсний импорт жилийн өмнөхөөс 69 хувиар буурсан байна. НҮБ-ийн Аюулгүйн зөвлөлийн хориг арга хэмжээний хүрээнд БНАСАУ-тай хийх худалдаанд хориг тавиад байгаа юм. БНХАУ 2017 онд 69.35 сая тонн коксжих нүүрс импортолсон нь хэмжээний хувьд 17 хувиар өссөн болохыг Гаалийн ерөнхий газар мэдээллээ. Мөнгөн дүнгээр тооцвол 98 хувиар өсөж, 9.32 тэрбум ам.доллар болсон нь коксжих нүүрсний ханш 80 гаруй хувиар өссөнтэй холбоотой ажээ.

Харин Үндэсний статистикийн хорооны мэдээллээр Монгол Улс 2017 онд 33.4 сая тонн нүүрс экспортолсны 33 орчим сая тонныг БНХАУ-д гаргасан байна. Харин мөнгөн дүнгээр энэ нь 2.25 тэрбум ам.доллар болжээ. БНХАУ-ын Засгийн газар байгаль орчны асуудалд онцгойлон анхаарах болсонтой холбоотойгоор коксжих нүүрс хэрэглэдэг ган, хөнгөн цагаан боловсруулдаг хуучин үйлдвэрүүдийнхээ үйл ажиллагааг зогсоож магадгүй гэж “Bloomberg Intelligence” мэдээллээ. Одоогоор ӨМӨЗО болон Жянси тэргүүтэй найман мужид хяналт хийж байгаа юм байна.

Эх сурвалж: Bloomberg Mongolia


January 25, 2018
Вэб дизайн & Вэб сайтыг Safesoft Solution LLC хөгжүүлэв.
Бүх эрх хуулиар хамгаалагдсан.