Гашуунсухайт боомтын дараалал буурав


Гашуунсухайт боомтод үүссэн дараалал багасаж байгаа гэдгийг “Гашуунсухайт авто зам” ХХК мэдээллээ. Пүрэв гарагийн байдлаар боомт дээр “Шалган 3”-аас хойш нүүрс ачсан автомашины цувааны урт 46 км болсон байна. Үүнээс гадна пүрэв гарагт Гашуунсухайт-Ганцмод боомтоор нийт 1026 автомашин нүүрс тээвэрлэн гарсан нь өмнөх өдрүүдийнхээс нэмэгджээ. Харин нүүрсний тээвэр хийж байгаа компаниудыг төлөөлж “Монгол тээвэр нэгдэл” компани хил дээр үүссэн дараалал зарим тохиолдолд 140 км хүрсэн талаар мэдээлсэн юм. 2018 он гарснаас хойш 4-6 дугаар сард Гашуунсухайт-Ганцмод боомтоор өдөрт дунджаар 850-950 тээврийн хэрэгсэл нэвтэрсэн талаар боомтын захиргаа мэдээлж байна. Монгол Улсын Засгийн газар өнгөрсөн зургаадугаар сард тогтоол гаргаж, Тавантолгой-Гашуунсухайт чиглэлийн уртын тээврийг эхлүүлсэн юм. Ингэснээр Тавантолгой-Цагаан хад-Гашуунсухайт, Тавантолгой-Гашуунсухайт гэсэн маршрутаар нүүрс тээвэрлэж байна. Энэ нь нүүрсний автомашинуудын тоо нэмэгдэхэд нөлөөлсөн гэж “Монгол тээвэр нэгдэл” ХХК онцоллоо. Мөн хил дээр үүссэн дараалал нь БНХАУ-ын талын нүүрсний татан авалтаас шууд хамаарч байгаа гэдгийг талууд онцолж байна.

Эх сурвалж: Bloomberg Mongolia


September 3, 2018
Вэб дизайн & Вэб сайтыг Safesoft Solution LLC хөгжүүлэв.
Бүх эрх хуулиар хамгаалагдсан.