Эрдэнэс Тавантолгойн 1072 хувьцааны мэдээллийн төв нээгдлээ


Эрдэнэс Тавантолгой компанийн 1072 хувьцааны мэдээллийн төв өнөөдөр нээгдлээ. Тус мэдээллийн төв нь 1072 хувьцааны талаарх бүх мэдээллийг иргэдэд өгөх зорилготой аж. 1072 хувьцааг хэрхэн арилжих, ямар үнэтэй байх, өвлүүлж болох эсэх, танд хэдэн ширхэг хувьцаа байгаа зэрэг хувьцааны талаар бүх мэдээллийг энэ төвөөс авах боломжтой юм байна. Мөн хувьцааны талаарх бүх төрлийн сургалт энд явагдах аж.  Сүхбаатарын талбайн баруун талд байрлах  тус төвд иргэд өөрийн биеэр очиж мэдээлэл авахаас гадна 1800-1072 утсаар холбогдож болно.

 

 

Нээлтийн ажиллагааны үеэр Эрдэнэс Тавантолгой компанийн гүйцэтгэх захирал Б.Ганхуягаас хувьцааны талаар тодрууллаа.

 

-Иргэдэд ногдол ашиг тараах нөхцөл бүрдэж байна уу?

 

-Компанийн нийт хувьцааны 14.5 хувийг 2.5 иргэн эзэмшдэг. Тэтгэврийн насныхан, оюутнууд сургалтын төлбөр хэлбэрээр, иргэд 300 төгрөгийг хэсэгчлэн авсан иргэд байгаа. Бид нэг иргэнд хэдэн төгрөгийн ногдол ашиг тараах талаар нарийвчилсан тооцоог хийж байгаа. Ирэх есдүгээр сард холбогдох газруудад хүлээлгэж өгнө.

 

-Эрдэнэс Тавантолгой хаалттай компани гэх шүүмж нэлээд байдаг. Хувьцааг нээлттэйгээр арилжих боломж бий юу?

 

-Эрдэнэс Тавантолгой бол хаалттай компани. Хувьцаагаа шууд хөрөнгийн биржид гаргаад арилждаггүй. Засгийн газрын тогтоолоор ч юм уу хувьцаагаа шууд нээлттэй арилжихаар иргэдийн хувьцаа эрсдэлд орно. Иргэд шууд зарахаар хувьцааны үнэ 933 төгрөг бус түүнээс доош үнэлгээтэй болох магадлалтай. Иргэдийн хувьцаа эзэмших эрхийг хамгаалж, хаалттай байгаа юм. Түүнээс Эрдэнэс Тавантолгой санхүү, үйл ажиллагааны хувьд хаалттай биш гэдгийг компанийн зүгээс албан ёсоор мэдэгдэж байна.

 


May 22, 2018
Вэб дизайн & Вэб сайтыг Safesoft Solution LLC хөгжүүлэв.
Бүх эрх хуулиар хамгаалагдсан.